tekststørrelseindkøbskurv
AllaffigitigutIkinngutinnut ingerlateqqiguk
 

"Atuaqatigiit pujortartuunngitsut 2012" pillugu akullerni atuartunut unammisitsineq

Matumuuna nalunaarutigineqarpoq "Atuaqatigiit pujortartuunngitsut 2012" unammisitsineq aallartittoq.

 

Unammisitsinerup atortussiartaasa quppersagartaa unammisitsinermut piumasaqaatit pillugit quppersagaq aamma allagartarsuartaa atuarfiup imaluunniit klassit opslagstavliinut nivinngagassiaq, aaneqarsinnaapput - uani.

 

Unammisitsinermi siunertaq

Unammisitsinerup siunertaraa meeqqat avatangiisitik ulluinnarnilu unammillernarsinnaasut naapittakkatik tunngavigalugit peqqissumik qinigassaqarsinnaanerat aammalu inuunermik peqqinnartumik qinigaqarsinnaanerannik ilisimassusaasa annertunerulersinnissaanik. Peqqinnerulersitsisinnaasunik sammisaqarneq siammarsaanerlu aqqutigalugit, pingaartillugu atuartut namminneq pilersitsisinnaanerat peqataanerisigullu sunniuteqarsinnaanerat suliaqarneranni qitiutinneqassapput.

 

Suliassaq

Unammisitsinermi peqataaniaraanni atuaqatigiit qanoq iliorlutik klassiminni pujortartalertoqannginnissaa qulakkeerniarlugu iliuusissamut pilersaarummik suliaqassapput.  Iliuusissamut pilersaarusiaq akullerni atuartuunerup iluata nalaani atuutsinneqartussatut suliarineqassaaq. Pujortartarneq akiorniarlugu klassi pitsaanerpaamik iliuusissamik pilersaarusiorluarnerpaasut unammisitsinermi ajugaasutut toqqarneqassaaq.

 

Akissarsiassat

Unammisuni ajugaasut akissarsiarissavaat 30.000 kruunit.

 

Unammisitsinermi piumasaqaatit

Unammisitsinermi peqataasussanut piumasaqaatit pingasuupput:

1. Atuaqatigiit unammisitsinerup naammassinerani tamarmik pujortartuussanngillat.
2. Akullerni atuartuunerup iluata nalaani qanoq iliorluni pujortartoqanngiinnarnissaa qulakkeerniarlugu iliuusissamut pilersaarummik sanasoqassaaq.
3. Klassimi qanoq ilillutik pujortarunnaarsimanersut, aamma atuaqatigiit qanoq iliorlutik pujortartartuunngiinnarnissartik suliniutiginiarneraat, iliuusissamut pilersaarummi naatsumik erseqqissumillu allaaserineqassapput. Nalunaarusiaq elektroniskiusumik nassiunneqassaaq.

 

Nalunaarfissaq

Unammisitsinermut peqataanissamut nalunaarfissaq kingulleq tassaavoq 1. september 2012.

 

Nalunaarusiamik tunniussivissaq

Nalunaarusiaq tunniutereerneqarsimassaaq kingusinnerpaamik ulloq 30. november 2012.

Nalunaarusiaq elektroniskiusumik Peqqissutsimut Naalakkersuisoqarfimmut nassiunneqassaaq, email: pn@nanoq.gl

 

Unammisitsinermut akisussaavoq:

Peqqissutsimut Naalakkersuisoqarfik
Postboks 1160, 3900 Nuuk
pn@nanoq.gl - tlf. 34 50 00