tekststørrelseindkøbskurv
AllaffigitigutIkinngutinnut ingerlateqqiguk
 

Naartuersittarneq

Nunatsinni arnarpassuit kissaatiginagu naartulersoortarput. Arnat kikkulluunniit kissaatiginagu naartulersimasut pisinnaatitaapput sapaatit akunneri 12-it qaangiutsinnagit naartuersinnissaminnik. Assigiinngitsorpassuarnik pissuteqarluni naartuersinneq atorneqartarpoq. Ilaatigullumi allaat naartunaveersaatit atorneqaraluartut kissaatiginngisamik naartulertoqarsin­naasarpoq. Arnat kinguaassiorsinnaalersimasut tamarmik atoqateqarnermi siullerpaami naartulersinnaasarput.

 

"Misileraassanngilatit" naartulersinnaanerlutit ¿ naartuersinneq naartunaveersaatitut atorneqassanngilaq. Naartuersinnerli allamik periarfissaqartinnagu periarfissatut KINGULLERTUT atugassaavoq. Tamatumunnga pissutaavoq naartuersinneq arnanut timikkut tarnikkullu kingunipiloqarsin­naammat.

 

Isumasioqatigiinnikkut naartuersitsineq

Arnaq kinaluunniit kissaatiginngisaminik naartulersoq naartulernermiit sap.ak. 12-it qaangiunneranni isumasioqatigiinnikkut naartuersinnissaminik qinnuteqarsinnaavoq. Isumasioqatigiinni peqataasarput isumaginninnermi peqqinnissaqarfimmilu sulisut. Najukkami napparsimmavik imaluunniit peqqissaavik aqqutigalugu isumasioqatigiinnikkut naartuersinnissaq qinnutigineqarsinnaavoq. Pissuteqavitsilluni aatsaat, soorlu pinngitsaalineqarluni atoqatigineqarsimagaanni imaluunniit inuttut annertoorujussuarnik ajornartorsiuteqaraanni isumasioqatigiinnikkut naartuersittoqarsinnaavoq.

 

Uani paasissutissanik pissarsisoqarsinnaavoq:

Naartunaveersaatit pillugit paasisaqarnerorusukkuit najukkanni napparsimmavimmut saaffiginnissinnaavutit, tassanilu nakorsamik, peqqissaasumik peqqissaanermillu ikiorti.

 

Aaqaleraangavit ullorsiutinnut tamatigut krydsiliisarit.