tekststørrelseindkøbskurv
AllaffigitigutIkinngutinnut ingerlateqqiguk
 

Hormonspirali

Isumannaassusia

Hormonspirali atorukku naartulinnginnissat 99,5%-imik qulakkeerneqassaaq. P-pillitulli isumannaatsigisutut oqaatigineqarsinnaavoq.

 

Pitsaaqutai

Hormonspirali T-tut iluseqarpoq illissap iluliumanertaani sunniusimanerusartoq. Sunniuttarneranut ilaatigut patsisaasorineqarpoq illissap ameraasaata sunnerneqartarnera, taamaalilluni mannissap nippunnissaa pinngitsoortinneqartarluni, ilaatigullu illissap paavata nigguusaa hormonimit allanngortinneqartartoq anisuup aqqusaarnissaa ajornakusuulersinneqartarluni. Hormonspirali aammattaaq aaqarujussuartarnermut atorneqarsinnaavoq, arnallu utoqqaliarsaalernermut ikaarsaartut østrogenimik iluaqusersorneqartut gestagenimik pisariaqartitaattut annertutigisumik pilersorsinnaallugit. Spirali ernereersimasunut naleqqunneruvoq.

 

Akornutai

Niaqunnguneq, ivianginik sukangatitsineq aamma amerlunneq annikitsumik akornutaasinnaapput, nalinginnaasumik qaammatit pingasut ingerlaneranni qaangiuttartut. Aaqartarnerup allanngornera, aaqalaaqattaartalernikkut imaluunniit nalinginnaasumik aaqassaarnikkut, taamaattumik illersuuteqarnerup atorunnaarneranut pissutaakkajunnersaavoq. Aammattaaq aniasoqalersinnaavoq kiisalu appasissukkut qitilerineq naakkullu anniarneq misigineqarsinnaallutik. Ilukkut aseruuttoorneq illissamillu aseruuttoorneq naapitassaasinnaapput. Spiralip katattoornissaa annikitsuaraavoq, taamatulli pisoqarsinnaavoq, pingaartumik ukiumi siullermi. Spiralimiit allunaasaaraasannguaq illissap paavatigut nuisasarpoq. Inuaq ataaseq inussalluunniit marluk atorlugit allunaasaaraasannguaq taanna malugisinnaagaanni ilimagisariaqarpoq spirali pissusissamisut ikkusimasoq. Aaqarujussuarnermut ataavartumillu anniarnermut pissutaasinnaavoq spiralip katangajassimanera. 

 

Naartuneq milutsitsinerlu

Hormonspirali atortillugu naartuleraanni naartuersinnissaq isumaliutigisariaqarpoq, hormonip naartoq akornusersinnaagaa ilimanarsinnaammat.

 

Naak hormoni aak aqqutigalugu immummut akuliussinnaagaluartoq aammut akuliuttoq ima annikitsigaaq meeqqamut miluttumut sunniuteqarnaviarani.

 

Ataavartumik tassanngaannartumilluunniit ilulukkaanni hormonspirali atorneqaqqusaanngilaq. Ersiutitaqanngitsumik iluluttoqannginnera paasiniarlugu spiralip ikkunneranut atatillugu bakteriaqartoqarnera misissorneqakkajuttarpoq.