tekststørrelseindkøbskurv
AllaffigitigutIkinngutinnut ingerlateqqiguk
 

Implantat - Timimut ivertitaq

Isumannaassusia

Naartunaveersaat taanna atoraanni naartulinnginnissaq 99,5%-imik qulakkeerneqassaaq. Ivertinneqarnerata kingorna qaammammi siullermi ajornartorsiutaasinnaavoq.

 

Implantat, naartunaveersaat timimut ivertittagaq nutaaliaalluinnarpoq. Implantati taamaallaat gestagenimik, mannissap kaanngarnissaagaluanik pinngitsoortitsisartumik illissallu ilumarnata ameraasaata pissusaanik, anisuup uumasuaraasa illissamut appakaannissaat ajornakusoortilerlugu allanngortitsisartumik, akoqarpoq. Implantati 2 mm-inik silissuseqarpoq 4 cm-inillu takissuseqarluni.

 

Kikkut implantati atorsinnaavaat?

Implantati arnanit tamanit ajornaatsumik sivisuumillu naartulernissamut illersuuteqarusuttunit atorneqarsinnaavoq. Implantati aaqqiissutaasinnaavoq pitsaasoq, meerartaaqqikkusunngikkuit naartusinnaajunnaarsagaanissallu isumaliutigigukku. Implantati arnanit østrogenimik sapigaqartunit aammattaaq atorneqarsinnaavoq.

 

Nappaatit atoqatigiinnikkut tuniluuttartut

Implantati kinguaassiuutitigut nappaatinut tuniluuttartunut illersuutaanngilaq. Kinguaassiuutiti­gut nappaatinik tunillatsikkusunngikkaanni usuup puua atortariaqarpoq.

 

Implantati timimut ivertitinniaraanni

  • Implantati timinnut ivertitinniarukku nakorsamut saaffiginnissaatit
  • Nakorsap siunnersussavaatit implantati qanoq ilinikkut ivertinneqassanersoq
  • Aaqalerninniit ullut tallimat ingerlaneranni ivertissallugu naleqqunnerpaavoq
  • Implantati piffissaq sivikitsuaraannaq atorlugu ivertinneqartarpoq
  • Immaqa ikkuffissaatigut qeritinneqassaatit ivertitsissullu immikkut sanaaq atorlugu assaqqunni ammit sukatseriarlugu ammip ikianut ivertinneqassaaq
  • Implantati ivertinneqareerpat talikkut nimiuserneqassaatit tilluusersornissat pitsaaliorniarlugu
  • Nermutivit eqqaa nalunaaquttap akunnerini tullerni 24-ni masatsaaliorlugulu ippatsaaliussavat, tamatumalu kingorna nermutit peerneqassaaq

Akornutai

Implantatip ivertinneqarneranut peerneqarneranullu atasumik ivertiffia ungilassinnaasarpoq amerlukujulerluni annernarlunilu. Naartunaveersaatit allat assigalugit assigiinngitsunik kingunerlutsitsisarpoq: niaqunnguneq, ivianginik sukangatitsineq, meriannguneq, amerlulerneq, qiimassutsip allanngorarnera, atoqateqarusussutsip allanngornera, nasserineq aamma aaqarnermi anniarneq. Arnat pualavallaartut implantatimik ivertitsivigitissimasut atortuata ukiut pingajussaani sunniutaata kimeerukkiartulernissaa naatsorsuutigineqarsinnaavoq. Taamaattumik pualavallaaruit siusinnerusukkut taarsertinnissaa isumaliutigisariaqarpat.

 

Pitsaaqutai

Ukiuni pingasuni taarserneqarani sunniusimasarpoq, ukiunilu pingasuni taakkunani kissaatiginngisamik naartulernissamut illersuutaalluni. Arnat amerlanersaasa gestagenimik sapigaqanngitsut implantati atorsinnaavaat. Atuisup ullut tamakkiallugit iliuuseqarnissaa pisariaqanngilaq. Implantati qaqugukkulluunniit peerneqarsinnaavoq. Peerneqarnerata kingorna sapaatip akunneri pingasut qaangiunneranni naartuleqqissinnaanngussaatit. Arnanit østrogenimik sapigaqartunit imaluunniit østrogenitorusunngitsunit atorneqarsinnaavoq. Kinguaassiorsinnaajunnaarsitaanermut taarsiullugu atorneqarsinnaalluarpoq.

 

Naartunaveersaat taanna HIV-mut imaluunniit nappaatinut atoqatigiinnikkut tuniluuttartunut illersuutaanngilaq.