tekststørrelseindkøbskurv
AllaffigitigutIkinngutinnut ingerlateqqiguk
 

P-pillit

Isumannaassusiat

P-pillit pissusissarluinnaattut atorukkit naartulinnginnissat 99,5%-ingajalluinnarmik  qulakkeerneqassaaq.

P-pillit pillugit paasissutissat

P-pillit naartunaveersaataapput pisariitsut, iisartagaallutik hormoninik assigiinngitsunik marlunnik akullit: østrogen aammalu gestagen. Apeqqutaallutik iisartakkat sorliit, assigiinngit­sunik hormoninik annertussusilinnik akullit pineqarsinnaapput. P-pillit nutaaliaanerpaat immannguaq hormonitaqartarput illersuutaanerat ajoqusinngikkaluarlugit. P-pillit arnanit 35-t sinnerlugit ukiulinnit, ullormut qulit sinnerlugit cigaretitortartunit atussallugit naleqqutinngillat.

Kinguaassiuutitigut nappaatit

P-pillit assigiinngitsut tamarmik kinguaassiuutitigut nappaatinut tuniluuttartunut illersuutaanngillat. Atoqatigiinnermi nappaatinut illersorniaraanni usuup puua pinngitsoorani aamma atortariaqar­poq.

P-pillit assigiinngitsut atorneqarsinnaasut

P-pillit assigiinngitsut naartunaveersaatitut atorneqarsinnaapput. Ilaatigullu nalunarsinnaavoq sorliit ilinnut pitsaasuunersut. Silatusaarneruvoq siullerpaamik p-pillit naartunaveersaatitut atorniaraanni hormoninik annikitsuinnarmik akulinnik atuinissaq. Iisartakkat ilaat assigiinngit­sunik marlunnik annertussusilinnik hormonitaqarput, ilaallu pingasunik assigiinngitsunik annertussusilinnik akoqartarlutik.    

P-pillit imatut sunniuttarput

P-pillit mannissap kaanngarnissaa pinngitsoortittarpaat, hormonit mannissaqarfik illissallu paavata sarajannera sunnertarmassuk. Aamma hormonit gestagenertallit mannissap illissamut nippunnissaa pinngitsoortittarpaat. Timmittaruit imaluunniit meriartaruit naartunaveersaatip sunniuttarnera annikinnerussaaq, allatullu naartulersinnaanermut illersuuteqassaatit - nalinginnaasumik usuup puuinik - tullissaanik p-pillitulernissap tungaanut.

P-pillitaarniarnermi nakorsap peqataaffigisassai

  • Nakorsap ilut misissussavaa.
  • Aappit naqitsinera uuttorneqassaaq oqimaalutarneqassallutillu.
  • Ilaatigut aassiorneqarsinnaavutit.
  • Nakorsap aalajangissavaa ilinnut p-pillit suut naartunaveersaatigissallugit pitsaasuu­nersut, iisartakkallu napparsimmavimmit/peqqissaavimmit imaluunniit nunaqarfimmi nakorsiartarfimmit tunniunneqassap­put.
  • P-pillit atorunnaarusukkukkit naartorusunnallu, taava naartunaveersaat alla pillugu nakorsaq oqaloqatigiuk. Kaammattuutigineqassaaq usuup puui atortassagitit allamik naartunaveersaateqalernissat pillugu nakorsamik oqaloqateqannginninni.

P-pillit pitsaaqutaat

  • P-pillit naartunaveersaataapput ajornaatsut isumannaatsullu.
  • P-pillit ullormiit aaqalerfimmiit iisarukkit ingerlaannaq sunniutissapput.
  • Misissuinerit takutissimavaat arnani mannissaqarfikkut aammalu illissap paavatigut  kræfteqalersinnaaneq p-pillit millisittaraat.

P-pillit akornutaat

P-pillit atornerini qaammatini siullerni, allaat ukiup affaa tikillugu ippinnaateqalaarsinnaapput, soorlu meriannguneq, ivianginnik sukattoorneq, niaqorlunneq aaqalaartarnerluunniit.

 

Nappaatit ilaasa atornerini p-pillit atorneqaqquneqanngillat. Napparsimalersimaguit, imaluunniit napparsimasutut misigisimaguit nakorsiartariaqarputit.

 

Oqimaallisinnaavutit aavillu naqitsinera qaffassinnaavoq. Nakorsap arnat 35-t sinnerlugit ukiullit ullormullu qulit sinnerlugit cigaretsitortartut qaqutigorujussuaannaq p-pillinik tunisarpai.

 

Aallaqqaammut iisartakkat ullut tamaasa iissallugit puigoqqajaanarsinnaapput. Ullut arlaanni puigorsimagukkit eqqaaniariarlugit iisissaatit ataatsikkut marluk iissavatit. Taamaattumik iisartakkat iinissaat puigornaveersaakkit.

 

P-pillit kinguaassiuutitigut nappaatinut tuniluuttartunut, soorlu HIV-mut imaluunniit klamydiamut illersuutaanngillat. Aalajangersimasumik aappaqanngikkuit taava pingaaruteqarpoq atoqatigiilernermi  p-pillit saniatigut usuup puuata tamatigut atorneqartarnissaa.

 

P-pillit ukunannga atussallugit naleqqutinngillat

  • Arnat inuusuttut inerilluarsimanngitsut.
  • Arnat aavisa naqitsinerat qaffasippallaartut, sukkornermik napaatillit, migræne­qartartut, uummalluttut. Taakku arlaannik nappaateqaruit nakorsaq oqaloqatigiuk.
  • Arnat milutsitsisut, immukillisinnaapput, pingaartumik meerartaarnermiit sap. akunneri 8-t qaangiutsinnagit p-pillitulersimagunik. Tamatuma kingorna annikitsuaraannarmik sunniuteqarsinnaapput.
  • Arnat 35-t sinnerlugit ukiullit ullormullu qulit sinnerlugit cigaretsinik pujortartartut.