tekststørrelseindkøbskurv
AllaffigitigutIkinngutinnut ingerlateqqiguk
 

Spirali

Isumannaassusia

Spirali atorukku naartulinnginnissat 98%-imik qulakkeerneqassaaq.

 

Spirali naartunaveersaataavoq mikisunnguaq arnap illiaanut ikkunneqartartoq. Spirali plastikki­mik sanaajuvoq. Spiralit amerlanersaat isumannaatsooqqullugit allunaasaaraasamik kan-ngussaasu­mik nimigaapput, naartulinnginnissamut illersuutaanerat annerulersinniarlugu. Spiralit assigiinngitsunik angissuseqarput, atorneqarnerpaallu T-tut iluseqarput.

 

Spirali kikkut atorsinnaavaat?

Spirali arnanit naartoreersimasunit atussallugu piukkunnarneruvoq, naartoreernerup kingorna illiaq inissaqarnerulersimasarmat. Taamaammat arnanut inuusuttunut naartusimanngitsunut spirali innersuussutigineqarneq ajorpoq, ilukkut aseruuttoortoqarnissaa ilimanaateqarnerummat.

Kinguaassiuutitigut nappaatit

Spirali kinguaassiuutitigut nappaatinut illersuutaanngilaq. Kinguaassiuutitigut nappaatinik tuniluuttartunik tunillatsikkusunngikkaanni usuup puua atortariaqarpoq.

Spiralimik ikkussiffigitinniaraanni

  • Spiralilersikkusukkuit nakorsaq saaffigiuk.
  • Nakorsap iluit misissorneragut paasissavaa spirali sorleq ilinnut naartunaveersaatigissanerlu­gu naleqquttuunersoq.
  • Aaqaqqammernerup kingorna spirali illissannut ikkutissallugu pitsaanerpaajuvoq, spiralilu illissannut sullulik plastikkiusoq amitsunnguaq atorlugu ikkunneqassaaq.
  • Spiralip ikkunniarnera ippinnalaarsinnaavoq.
  • Spirali illissannut ikkunneqarneranit ukiuni 3-5-ni atasinnaavoq taavalu taarserneqartariaqarluni. Spiralit nutaaliaanerusut ilaat ukiut qulit angullugit atasinnaapput.

Spirali imatut sunniuttarpoq

Spiralip mannissap kinguaassanngorsimasup illissap iluanut nippunnissaa pinngitsoortit­tarpaa. Unngerutissiap kanngussaasup illissap ameraasaa sunnertarpaa, mannissaq kinguaassanngorsimasoq ikkussinnaajunnaarsillugu.

Spiralip ikkutereernerata kingorna sapaatip akunnerini marlussunni illissavit iluani sukattaqattaarnerit annikitsut malugisarsinnaavatit.

Aaqartarsinnaavutit aaqassamaalersutulluunniit ilukkut ippigisaqarlutit.  Aaqarunnaareeruit allunaasaaraasaq inussannik maluginiarsinnaavat, taamaalillutit spirali pissusissamisut inissisimanersoq qulakkeersinnaavat.

 

Spiralip pitsaaqutai

  • Spirali illissamut ajunngitsumik ikkunneqarniariarluni iluaqutaalersarpoq.
  • Spirali timivit mannissaliorneranut hormoniliorneranullu sunniuteqanngilaq.
  • Arnap timaanit iluarineqaruni taamaallaat nakorsamit ilukkut misissortilernermi eqqarsaatigisariaqarpoq.

Spiralip akornutai

  • Spiraleqaraanni aaqartarneq sakkortunerulersinnaavoq, ilaatigullu aaqarnermi anniartoqarsinnaalluni.
  • Spirali atorukku iluloqqajaasinnaavutit pingaartumik assigiinngitsunik atoqateqartaruit.
  • Spirali illissannut ikkunneqarsimatsiaannarluni aaqarnermiluun­niit katassinnaavoq. Taamaattumik spirali iluamik ikkusimanersoq misissussallugu pingaaruteqarpoq, allunaasaaraasaq suli atanersoq misissorlugu.
  • Spiraleqarlutit naartulertuussagaluaruit erniinnaq nakorsaq saaffigisariaqarpat. Meerartaarusukkuit spirali peertariaqarpoq, taamaattoqanngippat naartumik katatsisoqarsinnaammat.

Spiralip nakkutiginera

Spirali iluamik ikkusimanersoq misissussallugu pingaaruteqarpoq. Taamaattumik nalinginnaa­sumik nakorsap spiralit ajunnginnersoq misissorumassavaa ikkutereerneranit qaammatit 1-3-it kingorna. Tamatuma kingorna ukiumut ataasiarluni misissorneqartassaaq. Aamma illit nammineerlutit misissorsinnaavat inussat utsunnut mangullugu spiralip allunaasaaraasartaa maluginiarlugu.